Monday, May 04, 2015

Wakazi wa nyumba 150 wamepoteza makazi yao baada ya nyumba zao kuvunjwa na serikali wilaya ya ilala.



Wakazi wa nyumba zaidi ya mia moja na hamsini zilizokamilika na zilizo katika ujenzi kwenye eneo la vikongoro -CHANIKA wamejikuta wakipoteza makazi yao baada ya nyumba hizo kuvunjwa na serikali wilaya ya ilala kwa kudaiwa kuwa ni wavamizi.
Ni sehemu ya wakazi wa eneo hilo la vikongoro wakipaza sauti zao mara baada ya ITV kufika eneo la tukio kushuhudia kilichotendeka ambapo wakazi hao wamesema wamevunjiwa nyumba  zao pamoja na zile walizokuwa wakiendelea kujenga ilhali wanamiliki maeneo hayo kihalali.
 
Mmoja kati ya wakazi  wa eneo hilo EFESO MSEMO amesema vijana waliohusika na kufanya  uvunjaji huo walikuwa wakichukua  vitu walivyokuwa wakikuta ndani ya nyumba hizo sambamba na kunywa vinywaji walivyokuwa wakikuta katika maduka wanayoyavunja.
 
Mwenyekiti wa serikali  ya mtaa huo ameiambia ITV kwa njia ya simu kuwa alipewa taarifa na kamanda wa polisi wa wilaya ya kipolisi ya ukonga kuwa uvunjaji huo unatokana na wakazi hao kuvamia katika eneo ambalo linamilikiwa kihalali na mtu mwingine.

Wednesday, April 29, 2015

Wakulima wa pamba shinyanga hatarini kuanguka kiuchumi.



Wananchi wa kata ya Nyankende katika wilaya ya kahama mkoani Shinyanga wameitaka serikali kutafuta mbinu za kupandisha bei ya pamba zao ambalo linategemewa katika shughuli zote za kimaendeleo hali  inayotishia kuporomoka kwa uchumi katika mkoa wa shinyanga na kuwafanya wananchi kuishi maisha duni na ya dhiki.
Hayo yamesemwa na diwani wa kata ya Nyankende wilayani kahama Mh. Doa Limbu kwa niaba ya wananchi wa kata hiyo katika mkutano wa hadhara ulioitishwa na mkuu wa mkoa wa shinyanga ili kujadili changamoto zinazowakabili wananchi hao ambapo kata hiyo haijawahi kutembelewa na mkuu wa mkoa yeyote tangu ianzishwe.
 
Naye mkuu wa wilaya ya kahama Bw.Benson Mwampesya amewataka wananchi wa kata ya Nyankende kulima mazao mengine ya biashara na chakula ikiwemo zao la alizeti kwakuwa kuanguka kwa bei ya zao la pamba sio swala la tanzania pekee na hakuna namna ya kupandisha bei ya zao hilo kwa haraka.
 
Kwa upande wake mkuu wa mkoa wa shinyanga Bw.Ally Nasoro Rufunga amewaahidi wananchi hao kuwaletea wawekezaji watakaoingia ubia katika kilimo cha mkataba hali itakayosababisha kukua kwa sekta ya kilimo katika kata hiyo.

Tuesday, April 28, 2015

Wananchi wa Mlonganzira wavamia ofisi za wizara ya ardhi nyumba na maendeleo ya makazi wakishinikiza kulipwa madai.



Baadhi ya wananchi wa eneo la Mloganzira Kwembe jijini Dar es Salaam wamevamia ofisi za wizara ya ardhi nyumba na maendeleo ya makazi wakishinikiza kulipwa madai yao ya fidia baada ya kupisha mradi wa chuo cha muhimbili na kusababisha shughuli za wizara hiyo kusimama kwa muda.
Wananchi hao wamevamia ofisi hizo huku wakiimba nyimbo mbalimbali zilizokuwa zikishinikiza kulipwa madai yao ambapo wamedai kuwa tangu waondoke kwenye maeneo yao kupisha mradi ni zaidi ya miaka kumi hawajalipwa licha ya Rais kuwaahidi kuwa hawataachwa bila kulipwa.
 
Kufuatia hali hiyo naibu waziri wa wizara hiyo Mh. Anjela Kairuki amelazimika kutoka ofisini na kuzungumza na wananchi hao ambapo amekutana na wakati mgumu kwani kila alipotaka kuzungumza nao baadhi yao walionekana kutoridhishwa na majibu yake na kuanza kumzomea, na baade aliweza kuwatuliza kwa kuwaeleza kuwa ndani ya siku saba watakwenda eneo husika kuzungumza nao.
 
Hata hivyo licha ya Mh.Kairuki kutoa kauli hiyo baadhi ya wananchi wamemweleza kuwa wakati wanamsubiri wanarudi kwenye maeneo yao huku wakitishia kusimamisha mradi hadi watakapolipwa fedha zao, ambapo kutokana na hali hiyo polisi walionekana kutanda katika eneo la wizara ya hiyo huku wengine wakiwa na silaha za moto.

Friday, April 24, 2015

Chadema yasikitishwa na wakazi wa mikoa ya Shinyanga na Simiyu kuendelea kuwa Maskini.

Chama cha demokrasia na maendeleo ( CHADEMA ), kimesema hakuna sababu ya wananchi wa kabila la wasukuma katika mikoa ya Shinyanga na Simiyu kuendelea kuwa maskini, wakati almasi peke yake iliyoanza kuchimbwa tangu mwaka 1942 katika mgodi wa mwadui, ingeweza kuboresha maisha yao mbali na wingi wa mifugo pamoja na uzalishaji wa zao la pamba na kusema wakati umefika kwa wananchi wa kabila hilo kutumia raslimali walizonazo katika kupiga vita umaskini.
Akihutubia mkutano wa hadhara katika uwanja wa lagangabilili wilayani itilima, mwenyekiti wa taifa wa chadema Mh. Freeman Mbowe amesema kwamba licha ya mikoa ya usukumani kusifika kwa uzalishaji wa pamba iliyopelekea kujengwa kwa viwanda vitano vya nguo ambavyo ni pamoja na Mwatex,Mutex,Kilitex,Kunguratex na urafiki wakati wa enzi za mwalimu Julius Nyerere, lakini amedai kuwa bado wasukuma ni maskini ukilinganisha na makabila mengine nchini kwa miaka 53 baada ya uhuru.
Mh. Mbowe ambaye pia ni kiongozi wa kambi rasmi ya upinzani bungeni akizungumzia mpango wa Chadema unaojulikana kama ‘FTP 200’ unaokusudia kuwafanya vijana wa kitanzania kuwa wazalendo kwa nchi yao katika kuwaepusha na vikundi vya kihalifu kama vile panya Road na Mbwa Mwitu kwa kusaidiana na jeshi la polisi kufichua vitendo vya uhalifu,amesema pindi ukikamilika mwezi juni mwaka huu utawafikia vijana zaidi ya milioni moja nchi nzima ambao wanaishi bila ajira rasmi kupata stadi za ujasiriamali,Elimu ya afya,nidhamu na kupiga vita Rushwa katika jamii.
 
Katika hatua nyingine wazee wa kabila la kisukuma wilayani humo wamemsimika mwenyekiti huyo wa taifa Chadema na mbunge wa jimbo la hai Mh.Freeman Mbowe kuwa Chifu wa kabila hilo baada ya kumvisha mgolole pamoja na kumkabidhi mkuki, ngao na kibuyu – huku wazee hao wakimpatia jina la mayengo na kutaka vyombo vya dola kutenda haki kwa vyama vyote vitakavyoshiriki katika uchaguzi mkuu.

Monday, April 20, 2015

Walemavu wa ngozi watakiwa kuboreshewa mazingira mapema badala ya kusubiri kutokea matukio mabaya.



Mashirika mbalimbali na watanzania kwa pamoja wameombwa kuwa na utamaduni wa kuchangia  na kuboresha shule maalumu ambazo zina walemavu wa ngozi ,badala ya kusubiri matukio ya uvamizi kutokea na kuanza kuchukuwa hatu ,kwa kufanya hivyo kuta saidia walemavu  wa ngozi kupata elimu bila ya kuwa na wasiwasi ya kuvamiwa na baadhi ya watu wenye nia mbaya.
Mkuu wa mkoa wa Singida Dk. Parseko Vicent Kone amesema hayo katika hotuba yake iliyo somwa na mkuu wa wilaya ya Singida, Bwana  Said Amanzi katika  hafla ya kukabidhi mradi wa uboreshaji wa miundombinu rafiki kutoka shirika la Koica la nchini korea,na kusema kuwa mashirika kutoka  mataifa  mengine wame weza kuchangia na sisi watanzania   inatubidi kuchangia kwani jukumu la kuwalinda walemavu wangozi ni ni la watanzai wenyewe na kuhakikisha wana pata  ulinzi na elimu kama watu wengine.
 
Kwa upande wake  meneja mradi wa kujitolea kutoka shirika la Koica nchini korea  Bi. Park Jieun amesema mradi wa uboreshaji  wa miundombinu katika chuo cha ufundi na marekebisho kwa watu wenye ulemavu sabasaba umegarimu zaidi ya shilingi milioni arobaini na mbili kwa ajili ya kuboresha mazingira ya chuo kwa kujenga mabweni,matanki ya maji na kuwasaidi walemavu  ili waweze kuishi kama watu wengi ambao siyo walemavu.
 
Awali mkuu wa  chuo cha ufundi na marekebisho kwa watu wenye ulemavu cha sabasaba Bi. Fatuma Malenga ameiomba serekali kuangali uwezekano wa kukijengea uzio chuo na kuweka  vivuko maalumu pamoja na alama katika barabara ambayo ipo karibu na chuo ili kuwawezesha wenye ulemavu wa ngozi na walemavu wengine kuishi katika mazigira salama.

Sunday, April 12, 2015

Chadema kimewataka watanzania kutambua dawa ya migomo na migogoro inayoendelea nchini.



Chama cha demokrasia na maendeleo -Chadema kimewataka watanzania kutambua, dawa ya migomo na migogoro kwenye sekta mbalimbali inayoendelea nchini ni kuiondoa CCM madarakani kupitia umoja wa katiba wa wananchi–UKAWA kwenye uchanguzi mkuu ujao, kwa kuwa imeshindwa kuyatafutia ufumbuzi matatizo ya wananchi.
Hayo yamesemwa na naibu katibu mkuu wa chama hicho John Mnyika kwenye mkutano wa uchanguzi wa viongozi wa kanda ya kusini wa chama hicho uliofanyika mkoani Mtwara, na kuhudhuriwa na viongozi wa ngazi mbalimbali wa Chadema toka mikoa ya Mtwara na Lindi, katika kutekeleza sera ya majimbo kwa mujibu wa katiba mpya ya chama hicho ambapo ulichagua mwenyekiti wa kanda, makamu mwenyekiti, mratibu wa kanda, afisa wa kanda na kamati 6 za utendaji za kanda hiyo ya kusini katika kuimarisha chama na kujiandaa na uchaguzi mkuu ujao.
 
Naibu katibu mkuu huyo wa Chadema John Mnyika amesema, taifa linapita kwenye migogoro na migomo inayoathiri uchumi na ustawi wa wananchi, na hivyo dawa ya kumaliza migomo na migogoro hiyo ni kuiondoa CCM madarakani kwenye uchaguzi mkuu ujao huko akidai umoja wa katiba ya wananchi - UKAWA ipo imara kutekeleza matarajia ya wananchi katika kushinda uchaguzi mkuu ujao.
 
Aidha baadhi ya washiriki wa mkutano huo wa uchaguzi wamewataka wanachama wa chama hicho kujitokeza kwa wingi kujiandikisha kwenye daftari la kudumu la kupigia kura wakati utakapowadia, ili kufanikisha malengo ya chadema na umoja wa katiba ya wananchi ukawa wa kushinda kwenye uchaguzi mkuu ujao yaweze kufanikiwa.

Ajali

#Tambuatz -  Kuna habari kwamba Basi la Nganga limegongana na Fuso na kuteketea na baadhi ya abiria  katika milima ya Udzungwa asubuhi hii.
Mwenye taarifa kamili atusaidie jamani.
Mungu Ibariki Tanzania na watu wake

Tuesday, April 07, 2015

Wakristo watakiwa kumuomba Mungu aliepushe taifa na matukio ya ubaguzi.



Kiongozi wa kanisa katoliki nchini Mwadhama Polycarp  Kadinali  Pengo  amewataka wakristo kote nchni kumuomba mungu aliepushe taifa na  matukio ya ubaguzi, vita, ugaidi  na mauaji yanayotokea Duniani ikiwemo mauaji ya kikatili ya wanafunzi waumini wa kikristo yaliyotokea katika  chuo kikuu cha Garisa nchini Kenya.
Akizungumza katika ibada ya Jumatatu ya Pasaka iliyohudhuriwa na mamia ya wanachama wa shirikisho la kwaya katoliki nchni, Kadinali Pengo pia amewataka wakristo nchini kumuomba mungu asafishe hali iliyojitokeza nchini Kenya na kuwataka kuwawajasiri na kubaki katika misimamo ya imaniya  kikristo kwa kutamka ukweli  iwapo hali hiyo italazika kujitokeza.
 
Aidha kuhusu katiba inayopendekezwa,Padinali Pengo  amesema kama kiongozi wa  Dini hawezi kurudia au kubadilisha kauli aliyokwisha itoa kwa wananchi,kwani kufanya hivyo kutaweza kusababisha ugomvi ambapo amewataka waumini wa kanisa katoliki kusambaza kauli hiyo kote nchni.
 
 Awali kiongozi wa kanisa katoliki nchini Mwadhama Polycarp  Kadinali  Pengo ametaka wananchi waachiwe wasome katiba inayopendekezwa na kufanya maamuzi wenyewe.